Lífeyrisgáttin - gáðu að réttindunum þínum!

Lífeyrisgáttin var opnuð þann 29. október á veraldarvefnum. Með henni geta landsmenn í fyrsta sinn fengið í einu lagi upplýsingar um heildar áunnin lífeyrisréttindi í samtryggingarsjóðum sem þeir hafa aflað sér.

Hingað til hafa sjóðfélagar fengið send yfirlit um hvar þeir eiga lífeyrisréttindi en hafa orðið sjálfir að draga saman upplýsingar heildstætt um sín réttindi. Algengt er að fólk eigi réttindi í nokkrum lífeyrissjóðum.

Lífeyrissjóðirnir skrá að sjálfsögðu innborguð iðgjöld fólks og halda þeim til haga hjá sér en það er ekki fyrr en nú að sjóðfélagar sjálfir geta kallað á einfaldan hátt eftir skrá yfir öll sín sameignarréttindi, með hjálp nýju Lífeyrisgáttarinnar. Upplýsingar um réttindi í séreignarsjóðum er ekki að finna í Lífeyrisgáttinni.

Lífeyrisgáttina er að finna á heimasíðum lífeyrissjóða landsins og þarf aðgangsorð til að nota hana, sama aðgangsorð og fyrir sjóðfélagavefina.

Opið hús hjá Söfnunarsjóði lífeyrisréttinda

Í tilefni þess að Lífeyrisgáttin var opnuð þann 29. október fá sjóðfélagar sérstakt tækifæri á þriðjudaginn kemur, 5. nóvember 2013 en þá verður opið til kl. 19:00 hjá Söfnunarsjóði lífeyrisréttinda, til að heilsa upp á starfsfólk sjóðsins og kynna sér gáttina betur, ræða um lífeyrisréttindi sín og lífeyrismál almennt.

Starfsfólk sjóðsins er auðvitað sjóðfélögum innan handar og veitir þeim aðstoð og upplýsingar á skrifstofutíma alla virka daga árið um kring en þann 5. nóvember hvetjum við sjóðfélaga beinlínis til að líta inn. Í boði verða veitingar ásamt áhugaverðum kynningum.